Кошничка

Да, повторно се наближува тој период од годината – зимата. Деновите стануваат поладни и пократки, а мракот е поприсутен од Сонцето, но сепак, тоа не значи дека е завршена сезоната за возење велосипед. Студот и лошите временски услови носат многу предизвици, но доколку вие и вашиот велосипед сте подготвени, ништо не може да ве спречи да продолжите да го користите вашето омилено превозно средство.

Вашиот велосипед треба да биде во перфектна состојба доколку планирате да го користите во зимски услови. Во продолжение прочитајте неколку совети кои ќе ви помогнат да го подготвите вашиот велосипед за претстојниот зимски период.

 

Одржување

Сите знаеме дека е подобро да се превенира отколку да се санира, па затоа треба да се осигурате дека вашиот велосипед е подготвен за зимски услови. Детално проверете ги сите делови, особено оние кои се најподложени на надворешните влијанија. Проверете ги кочниците, жиците и ланецот за знаци од корозија и користете лубриканти за да спречите формирање на рѓа.

Сервис

Пред почетокот на зимската сезона, од исклучителна важност е да се погрижите вашиот пријател на две тркала да биде подготвен за тешките услови. Целосна проверка на перформансите на главните компоненти и професионален сервис на велосипедот ќе помогнат да избегнете неочекувани дефекти и непријатни ситуации за време на возењето.

Светилки

Со доаѓањето на зимата и скратувањето на денот , многу е веројатно дека ќе го возите вашиот велосипед и кога ќе се спушти ноќта. Вашата безбедност на патот е најважна, па затоа осигурајте се дека сте видливи за останатите учесници во сообраќајот. Квалитетна бела предна светилка и задна црвена светилка дефинитивно ќе помогнат да бидете забележани на патот.

Доколку сте љубител на брзо возење или возите во планински услови, посилна предна светилка е препорачлива за да избегнете дупки и било какви препреки на патот. Покрај светилките препорачливо е да имате и катадиоптери кои ќе помогнат да бидете видливи на патот, а покрај тоа се добра замена за светилките во случај да останете без батерија.

 

Зимски гуми

Никој не би сакал да се најде во ситуација да поправа гума во надворешни услови, додека врне дожд или дува силен ветер, временски услови типични за зимскиот период во Македонија. За да избегнете оштетување на гумите препорачливо е да ги замените со зимски гуми или гуми со крампонки кои имаат поцврсти и поиздржливи ѕидови и заштитен слој кој спречува дупнување и пролизгување.

 

Калници

Без разлика дали го користите велосипедот како превозно средство за да стигнете до вашето работно место или сте авантурист кој вози на планини, за време на зимата вашиот велосипед треба да биде опремен со калници. Иако можеби не се толку популарни, калниците се неопходни во зима, ќе ви помогнат да останете суви и да не се извалкате, нешто што ќе го направи целото искуство на возење велосипед покомотно.

 

Редовно чистење

Зимата е период во кој вашиот велосипед е најподложен на надворешни влијанија. Чистете го вашиот велосипед после секое возење и доколку имате можност чувајте го во затворена просторија. Редовното чистење ќе го продолжи рокот на траење на компонентите ,  а ќе го заштедите и времете коа би го потрошиле за да исчистите засушени нечистотии и кал од вашиот велисипед.  Погрижете се ланецот да биде чист и подмачкувајте го со лубриканти еднаш неделно.

 

Leave a Reply

Листа на чекање Оставете го вашиот email и добијте известување кога производот ќе биде повторно на залиха.
Email Вашите податоци се безбедни.